IIMC-in Aizawlah Digital Journalism admission hawng

Indian Institute of Mass Communication North East Campus, Aizawlah session thar aṭangin PG Diploma Course in Digital Journalism hawn a ni dawn.

IIMC hian June 10 aṭang khan Kum 2022-23 atan Post Graduate Diploma Course hrang hrang dil theihna hun a hawng leh tawh a, July 31 hian Entrance Examination an buatsaih dawn a ni. Entrance exam hi National Testing Agency in CUET (PG) rualin an buatsaih dawn a, admission tiduh tan online application form leh admission information bulletin hi https://cuet.nta.nic.in/ ah download theih a ni.

North East Campus, Aizawl bikah hian kumin aṭang English Journalism Course bakah Digital Journalism course hi an hawng thar a, internet leh social media khawvela cheng mek kan ni bawk a, course ṭangkai tak a ni ngei ang.

IIMC NE Campus hi kum 2011-a din niin Mizoram University Campus chhungah awmin state hrang hrang aṭangin zirlai an nei ṭhin a, tunah hian an campus ngial nghet tur pawh sak zawhfel a ni tawh a ni.