Raftaar leh NT-a thawk dun

Mizo boxer lar NT Lalbiakkima chu Indian rapper lar Raftaar nen an thawk dun a, Bollywood movie lar tak taka sulhnu lo nei tawh rapper hian zanina NT-a te inhneka entry theme tur chu a phuahsak a ni.

NT-a hian zaninah WBC Asia continental title fight a nei dawn a, Philippines boxer Jayson Vayson nen an inhmachhawn dawn - inhnek hi Zonet PPV (distributor hnena Rs. 100 pekin) leh Zonet Empai (subscribe tan) kaltlangin a en theih dawn.

Dubai khawpuia inhnek tur atan hian Raftaar chuan NT-a hi hla a phuahsak a, Mizo boxer hian ring a pan rualin he hla hi a play dawn tihna a ni.

Raftaar hian Bollywood movie lar tak tak tan hla phuahin a lo sa/chham tawh ṭhin a, Bollywood movie lar Heropanti, Baaghi, Dangal, Jolly LLB 2 leh Tiger Zinda Hai-ah te pawh khan a hla phuah ho a lo sa tawh.

Brit Asia TV Music Awards-ah a hla "Swag Mera Desi" vangin Best Urban Single award a lo la tawh a, reality show lar tak tak MTV Hustle, Dance India Dance leh Roadies-ah te judge a lo ni tawh bawk.