Indian media-te ngaihven Odisha Thingtlang Rapper!

Rapper a ni a, a hming lem (stage name) lamah erawh 'Rocker' tihte a tel nawk mai! He pa, Odisha thingtlang tlangval kum 27 mi, Duleshwar Tandi hi hman ni lawkah thingpui dawra thleng siltu mai a ni a, tunah chuan Indian media lamin an ûm nasa ta hle mai.

'Rapper Dule Rocker' tiin a hming a invuah a, thiamna lamah chuan Science graduate ni mah se Odisha-a Kalahandi district-a chhungkaw harsa tak aṭanga sei lian a ni a, Chhattisgharh-a Raipur khuaah restaurant-a thleng sil faia

inhlawhfa mai a ni. Covid-19 avanga lockdown puan a nih khan an khuaah a haw a, a hun a inṭan ta chiah!

He tlangval hian India ram a thlir a, miretheite an rethei tawlh tawlh a, mi hausate an hausa zual zel a, kan politics kal vel hi miretheite harsatna belhchhahtu mai niin a ngai. Chutah Covid-19 avangin amah anga hnathawktu (migrant worker) haw thei lo tangkhang tam takin harsatna an tawk bawk - chu chu a thlir liam mai lo a, rap hmangin a puang chhuak ta.

An khua a thleng a, March thla khan rap video holam ve tak anga lang, 'Telling the truth' tih chu a siam a, hetah hian politician-te chu 'rukru' tiin na takin a dem. May-ah khan 'Sun Sarkar, Sat Katha,' tih video a siam leh a, hei hi Covid-19 avanga harsatna leh migrant worker-te tawrhna a au chhuahpuina a ni.

Heng a video-te hi rin loh takin a 'hit' ta phian mai a, media lamin an han bel chiang a, Dalit chhungkaw rethei aṭanga a harsatna rap hmanga a phuh chhuah hian ngaihven a hlawh ta a - tunah chuan Bollywood lam beng a thleng ta.

Hindi media hrang hrangin an ngiahven piah lamah English news ziahna chanchinbu hrang hrangah a hming a chuang a, a chanchinin ngaihven a hlawh - Bollywood music industry  lama milian Vishal Dadlani leh Sona Mohapatra-te'n puih an inhuam thu an sawi a, actress Richa Chadda leh Swara Bhasker-te pawhin an fak.