Rody-i’n Mizo mipui thlawpna a dil
Femina Miss India Grand Finale-a Mizoram aiawh tur Rody chuan nimin khan chanchin thar lakhawmtute kawmin, intihsiakna lian zawk neih tur atan Mizo mipuite thlawpna a dil a, Miss Multimedia atan amah follow turin Mizo mipuite min sawm.
Nimin khan Press Club-ah MJA te leh Rody te hi an inkawm ho. Inkawm honaah hian Fbb Femina Miss India grand finale neih turah hian Rody H. Vanlalhriatpuii chuan Mizo mipuite thlawpna a mamawh dawn tih sawiin, official-a amah vote hunah amah vote tur te, sub contest awm tur, Miss Multimedia atan ten amah thlawp turin a sawm.
Miss Multimedia hi social media-a thlawptu an neih leh neih loh, mipuite nena an inzarzawm dan enna tur a ni. Hemi atan hian Twitter, Instagram leh Facebook Page-a follow ngahte chu enna tur pawimawh a ni. Rody hian heng social media site-ah te hian amah follow turin mipuite min sawm. Miss Multimedia latu hi Top 10-a lang nghal tur a ni. Tunhnaia social media-a vote duh lo anga tarlan chu a dik lo tih sawiin, hetiangin engmah a sawi lo a ti.
Miss India atana East Zone contest a thlen tawh chinah te, Hindi a thiam loh avanga harsatna a tawh leh tawh loh zawhnaah Rody chuan, “Hindi thiam loh avangin harsatna ka tawk lo. English kan hman zawk zel avangin buaina a awm lo. India rama cheng kan nih avangin Hindi hi chu thiam ka la tum,” a ti. Miss Mizoram leh Miss India atana a thlen tawh chinah Mizo mipuite thlawpna ṭha tak a hmuh avangin a lawmzia a sawi a, amah thlawp zel turin a sawm. Miss Mizoram atana an inpuahchahna khan nasa takin a pui tih a sawi a, Miss Mizoram buaipuitute nen grooming leh training hrang hrang an neihpui dawn. May thla tawp lam hian Miss India tan Mizoram a chhuahsan leh ang.