Evans-a’n Captain America a chang tawh dawn lo
Kum 35 mi actor, Captain America (Steve Rogers) lema chang, Chris Evans hi Captain America lemah a chang tawh dawn lo nia thuthang awm chu The Ellen DeGeneres Show chuan a rawn nemnghet.
The Ellen DeGeneres Show-ah show host Ellen chuan Chris Evans hi zawtin, Evans chuan tuna Avengers film thar tur an chan mek hi Captain America lema a chan hnuhnung ber dawttu tur a ni ang a ti. Avengers thar ber tur, Avengers: Infinity War hi nakkuma tihchhuah tur a ni. Avengers film siam leh tur, a hming la phuah loh a chang leh phawt ang a, chumi hnuah chuan Captain America hi a chawlhsan ang.
Evans chuan, “Ka contract a tawp tawh dawn a ni. Ka contract neihah hian Avengers pathumna leh palina thleng a ni. Avengers pathumna ka ti tawh a, palina tur hi kumin chawhnu lamah a ni ang. Chumi hnuah chuan ka contract a tawp tawh dawn a ni,” a ti. Chang turin sawm leh ta se, contract ziahpui tum leh ta se, a pawm tur leh tur loh erawh engmah a sawi lo. Robert Downey Jr. pawhin Avengers palina dawtah chuan a chang zel tawh lo mai thei niin an sawi a, ani bakah hian Chris Hemsworth leh Mark Ruffalo te pawhin hetiang deuh chanchin hi an nei.