Synod Choir member tharte hlân

Kum 2020-2022 chhunga Mizoram Synod Choir member turte chu nizan khan Synod Conference Centre-ah Pathian hnena hlanna inkhawm neih a ni.

Central KṬP leader Rev. Vanlalmuanpuia Khiangte-in a kaihruai a, CKṬP general secretary T Upa Rochungnunga'n inhmelhriattirna hun a hmang. Synod moderator Rev. R Lalchangliana'n MSC member-te chu Pathian hnenah a hlân a, Synod secretary Rev. Vanlalrova Khiangte-in fuihna thu a sawi.

Synod Choir hi Synod aiawhin CKṬP-in a enkawl a, term tharah hian member 24 awmin, part tinah mi paruk zel an awm a; director chu Lalruatfela, CKṬP Committee member niin, conductor chu T Laldintluanga, Ramhlun North a ni.