Simple Plan bassist-in an band a chhuahsan

Simple Plan bassist David Desrosiers chuan mipat hmeichhiat lam hawia mawi lo taka chea puh a nih avangin an band a chhuahsan.

Fan pakhat chuan Twitter-ah kum a tlin hmain David Desrosiers hian a duh lo chung mipat hmeichhiatna a hmanpui niin French ṭawngin a ziak a, hemi a darh hnu hian Desrosiers chuan a ban thu tarlangin Simple Plan lam pawhin thuchhuah an siam ve nghal bawk.

Desrosiers chuan thuchhuah a siamin,"Tunhnaia thuchhuah ka hmuhah hmeichhia ka kawm ṭhinte lakah thilpawi ka thlen tih ka hria a, Chumi avang chuan band chhuahsan turin thutlukna ka siam a, hun lo la awm leh turah chuan fimkhur zawka hun hman ka tum bawk. Heng hmeichhiate laka thil pawi ka thlen avang hian pawi ka ti tak zet a ni," tiin a ziak.

Simple Plan pawhin Desrosiers-a'n an band a chhuahsan thu hi tarlang ve nghal bawkin,"A mimal buaina chingfel turin David Desrosiers chuan band a chhuahsan a ni. A thiltih avanga harsatna tawk hmeichhiate lakah ngaihdan kan dil. He thil thleng avanga lungawi lo kan fan-te chungah pawh ngaihdam kan dil bawk. Band kan nihna angin, hetiang thil hi a thlen nawn tawh lohna turin hma kan la ang," tiin an ziam ve bawk.

David Desrosiers hian kum 2000 khan pop-punk band lar tak Simple Plan hi a zawm a, mahse kum 2017 khan depression a neih avanga inenkawl turin band aṭang hian chawlh a la zuai a, kum 2019 khan a zawm leh a ni.

Mipat hmeichhiatna lam mualphopui hi milar zingah leh rockstar zingah hian an awm leh zauh ṭhin a, chung zingah chuan Black Label Society member Nick Catanese leh  Panic! at the Disco-a mi Kenny Harris-te pawh an tel.