YouTube-a channel nei turin Lawmi'n zaithiam dangte a duh

Lawmi Khiangte chuan YouTube-a a channel atan hla thar a peih leh ta a, zanin hian a hla thar hi YouTube-ah hian a dah ang.

Lawmi Khiangte hian YouTube-a a channel-ah hian hla pahnih ‘Hellai nun’ leh Bruno Mars hla ‘Billionaire’ te a dah tawh a, ‘Billionaire’ an siam dan video a dah tel bawk. He channel-ah hian hla thar a dah belh leh dawn a, a hla thar tur hi Goodnight Fellows hla ‘Hopeless Romance’ kha a ni. Live record a ni a, Kings and Prophets studio-a an record a ni. Beatboxer leh guitar te nena rem a ni a, beatboxer hi Ben a ni a, hollow bassist hi Sangsangi a ni a, Lalramhluna Sailo chu guitarist a ni. Camera hi RDS Mawitea a ni bawk.

YouTube channel avang hian Lawmi Khiangte hian hlawkna a tel chho mek a, India ram pawn aṭang­in collaborate tura sawmna pawh a dawng. Hetiang hi a nih avangin Lawmi Khiangte chuan zai­thiam dangte pawhin YouTube-ah channel nei se a duhpui hle a, aman channel a siam chhan ber pawh midang tihhmuhtu atan a ni a ti.

“YouTube-a channel ka siam chhan chu thiam tak tak, inthup kan tam a, chung mite khawvel puma an zai an lo hriat a, miin an lo hriat theih nan a ni,” tiin Lawmi Khiangte chuan a sawi. “Keima tan a ni lo a, midang, ka hnua lo kal zel turte tan a ni. Hnam dang hla cover (saksak) tam se, khawvel huap pawha lan theihna tur kawng a awm a ni. Mizote huang hi zauh ka duh a ni,” a ti. YouTube-a channel a neih a, Bruno Mars hla, Grace 10:45 nena an sak aṭangin ram dang aṭanga amah rawn be pawptu an awm zel a, mi hla sak dunpui tumte pawh a nei mek.

YouTube hmanga intar chhuah zel a tum bakah music lama hma a sawn lehzual nan Synod Music School-ah music a zir mek. Lawmi chuan, “Hnam dang zaithiamte hian music instrument pakhat tal thiam taka khawih theih an nei ṭhin. Keini Mizote pawh zai mai bakah music lama hma kan sawn a ngai a ni,” a ti.