Ramhlun North Branch KṬP Golden Jubilee Theme Song

Ramhlun North Branch KṬP tán kumin 2022 hi Golden Jubilee kum (kum 50-na) a ni a. Hemi pual hian Branch KṬP chuan Jubilee Theme song siamin music video zaninah an tichhuak dawn.

An theme song tihchhuah tur hi Ramhlun North mi tho, Chris MS Dawngkima phuah niin "Lawmthu hril ru" tih a ni a, Bible chang Sam 118:1 leh 2 Chronicles 5:13-14 behchhanin a phuah a ni.

He hla hi Ramhlun North Branch aṭanga zaithiamte leh Mizoram chhunga zaithiam lar tak takte'n an sa a, Praise On aṭanga hriat hlawh zaithiam inkawp rem tak pathum Arini Ralte, Cindy Lalthanpuii leh Zorinsanga Sailo te bakah Fiona Pachuau te, Julie Vanlaltai leh Lalduhawma Zote-te'n an aw mawi tak an thawh bawk.

A music hi Crosscraft-te kut chhuak niin belhchian a dawl dawn tih a chiang. Recording leh mixing pawh uluk takin EFX leh H.C Records-te'n an khawih bawk.

Best Music Video lawmman hial lo dawng tawh, Benjamin Hnamte chu Video Director niin, music video lama sulsutu SVP leh Marcus-a ten uluk takin video hi an khawih a ni.

Zanin dar 9:00 hian music video hi release a ni dâwn a, local cable TV leh YouTube lamah thlira ngaihthlak tur a awm ang.