Pepsi-in an ads an la bo ; Kendall Jenner ṭawng chhuah ve an phal lo

Pepsi ads-ah Kendall Jenner an hmang a, tihchhuah a nih hnu lawkah sawisel a hlawh a, inhnialna a chawk chhuak nghal a nih kha. Hetiang hi a nih avangin Pepsi chuan an ads hi an la bo a, thupha an chawi bawk.

Pepsi chuan, “Pepsi hian khawvel inpumkhatna tur te, muanna leh inhriatthiamna a awm theih nantea hma lak a tum a, mahse kan lo ṭhelh deuh a ni ang a, thupha kan chawi e,” an ti. Hei bakah model atana Kendall Jenner an hman thu leh, Kendall Jenner pawhin sawisel a hlawh tela chu pawi an ti hle tih an sawi bawk.

Pepsi chauh hi hetiang thila sawisel kai leh thupha chawi an ni lo a, Nivea pawhin an thil siam an faknaah thupha an lo chawi tawh bawk. Nivea hian an thil siam faknaah ‘White is purity’ tiin an fak a, vun rawng inthliarna tilang thei ang zawnga ngaih a nih avangin Nivea hi an sawisel nasa a, thupha an chawi phah.

Hetia thupha an chawi hnu hian Pepsi chuan engmah sawi chhuak lo turin Kendall Jenner hi an ti nia sawi a ni. Naughty Gossip chuan, “Pepsi ukilte chuan engmah a sawi chhuah an phal lo. Anni phalna lo chuan engmah a sawi chhuak thei lo,” tiin Ken­dall Jenner chanchin hi an sawi a, “Company phalna lo chuan interview pawh a nei thei lo a, ngawi reng turin an duh,” an ti.