Miss India Mizoram Rody-i’n Tleirawl Rûn a hawng

Zirtawpni khan Miss India Mizoram, Rody H. Vanlalhriatpuii chuan ‘Tleirawl Rûn’ a hawng. Tleirawl Rûn hi SHALOM buatsaih, Zemabawk North-a mi a ni a, tleirawlte nunkawng zirtirna leh an harsatnaah te an puih theihna tur, tleirawlte inkawmhlimna tur hmun a ni.

Rody hian Tleirawl Rûn a hawn hnu hian hemi hmuna tleirawl lenglutte nen an inkawmho nghal a, tleirawlte zawhna hrang hrang a chhang nghal bawk. Rody-i hi zirna lamah Master of Social Works a nih bakah, a tuina ber chu Adolescent Mental Health a ni.

Tleirawl Rûn hawnaah hian Miss India Mizoram chuan, “HIV&AIDS natna hi tihdam theih loh ni mah se a ven theih a, kum 14 - 25 inkar hi Mizorama he natna vei tam ber dawttu an ni pha a, ruihhlo hman sual pawh hetiang kumah hian a inṭan bakah, he natna ṭha lo laka an derthawn hunlai ber a ni. Mipat hmeichhiatna chungchangah pawh zirtirna mumal tak an dawn loh ṭhin avangin an derthawn hunlai tak a ni bawk a, hei vang hian rilru lama harsatna nei pawh an tam a, kaihruaitu ṭha an mamawh hunlai ber a ni. Tleirawlte tinzawn hmalakna hi a pawimawhzia hriain SHALOM chuan he project hi a kalpui mek a, he project-a ka tel ve thei hi ka lawm em em a ni,” a ti.

Rody-i’n Tleirawl Rûna hun a hmannaah hian tunlai tleirawlte mamawh tak chu Rilru Hrisel nia a hriat thu a sawi a, zu leh ruih theih thil chungchanga an zawhna chhangin “Kan chhia leh ṭha hriatna fîm tak a tihdanglam chiah hian mihring tan a hlauhawm ṭhin a ni” a ti. Zuk leh hmuam leh ruih theih thil a tih ngai loh thu a sawi a, ei leh in lamah pawh a tawk chauha ei ṭhin mi a nih thu a sawiin, tleirawlte chu taksa sawizawi ngai pawimawh turin a chah nghal.

SHALOM hian Aizawl hmar­chhak lama veng pangaah Adolescent HIV Prevention Project an kalpui mek a, tleirawl kum 14-19 inkar target-in, ruihhlo hmansual, mipat hmeichhiatna hman sual leh a kaihhnawih ṭha lo zirtirna an kalpui mek. Heng vengah te hian High/Higher School leh Sunday School naupangte zirtirna an pe a, residential camping te an buatsaih ṭhin. SHALOM hian volunteer-te kaltlangin SMS, Whatsapp leh Face­book hmangin tleirawlte zirtirna leh nun kawng dik kawhhmuhna thu an theh darh a, nu leh pate tan fate enkawl leh kaihhruai dan zirtirna whatsapp group hmangin an thawn darh ṭhin bawk.

Tleirawl Rûn hi Thawhlehni, Zirtawpni leh Inrinni-ah te an hawng ṭhin a, tleirawl a duh apiang tan a lên theih a, harsatna nei an awm pawhin thawktute’n an lo pui ṭhin.