Zaninah Nazareth concert Hologram tel lo ticket pawm dawn lo
Nazareth band chuan nimin khan Aizawl an rawn thleng a, zaninah an concert tawh dawn. Concert-na hmun tur hi Tribal Art Centre, Tanhril a ni a, dar 5 aṭangin gate hawn a ni ang.
Nazareth concert turah hian ticket an fimkhur dawn a, ticket lem a awm nia hriat a nih avangin ticket-a seal chhut loh leh hologram sticker bel loh chu pawm a ni lo ang. Ticket hi Y2Goal Agency, Chanmari; Lawma Enfield, Sikulpuikawn leh Israel Digiprint-ah te lei theih a ni ang. Hei bakah hian concert-na tur hmunah zawrh chhuah a ni bawk dawn; ticket hi Rs. 800 man a ni.
Nimin khan Nazareth band chuan Aizawl an rawn thleng a, Hotel Regency Conference Hall-ah chanchinbu mite nen an inkawm. An vocalist ṭhin Dan McCafferty-a'n an music a chawlhsan chhan sawiin, thâwkna lama harsatna a neih vang a ni an ti a, McCafferty hian kum 2013 khan music a chawlhsan.
Mizoram an rawn thleng chu mak an ti a, hmuhnawm an ti hle. Hetianga tlangram chhengchhia an la hmu ngai lo. Pete Agnew chuan, "Hmun zawlah pawh ni loin hmun awihah kan zai mai dawn emaw kan ti a," a ti, Mizoram chu an theihnghilh tawh loh tur thu an sawi. Zanina an concert turah hian an hla hit ho kha chu play vek an tum.
Nazareth hi kum 1988 khan Mumbai-ah an rawn concert tawh a, chumi hnua India rama an rawn kal leh hmasak ber a ni. Tunah hian member pali an ni a, Pete Agnew chu bassist a nih bakah backing vocals a ni a, Lee Agnew chu drummer a nih bakah vocals a pui. Jimmy Murrison chu guitarist a ni a, Carl Sentance chu an vocalist a ni.