Zoramchhani album thar Darbu lamah a lei theih dawn e

Youth Icon hmasa ber Zoramchhani chuan Zirtawpni hian a album palina tur 'Zoramchhani Fak Zai Ri' chu a tlangzarh dawn.

'Zoramchhani Fak Zai Ri' hi June 24, 2022 zan dar 7-ah Chanmari YMA Hall-ah tlangzarh a ni dawn a, genre inang lo tak tak hla 12 a awm dawn thu Zoramchhani chuan a sawi. Tlangzarh a nih hnuah hian Mizo apps ngei Darbu Music & Audio App lamah lei theihin a chhawp chhuak nghal dawn bawk a, Zoramchhani zai ngainatute tan chuan ngaihven ran chi a ni ang.

Kum 2006-ah daih tawh khan Zoramchhani hi Youth Icon a lo ni tawh a, tunah hian album pathum tichhuak tawhin 'Ka lo Haw' leh 'Aw Khawngaihtu' tih a tihchhuah tawh bakah Krismas album 'Krismas Chibai' tih chu a tichhuak tawh a ni. 'Aw Khawngaihtu' a tihchhuah hnuah khan album hun rei tak chhung a tichhuak tawh loa, kum 14 lai a ral hnuah 'Zoramchhani Fak Zai Ri' hi a chhawp chhuak leh dawn a ni.

Darbu app lamah hian Mizo hla tam tak dah a ni tawh a, Mizo Idol Jerry-a hla tihchhuah thar 'Thlarauvin Min Hruai Rawh' tih pawh kha dah ni tawhin hranghlui zaithiamte hla aṭanga tunlai hla chhuak thar ber ber thlengin ngaihthlak theihin a awm tawh.