Billboard Music Awards Category hrang hrangah The Chainsmokers lang hnem ber

Billboard Music Awards sem tur atan nomination list tar chhuah a ni a, The Chainsmokers an langsar ber a, category 15-ah ngawt an lang.

The Chainsmokers hi an hla Closer leh Don’t Let Me Down hmangtein category 15-ah ngawt an lang a, a pumpui thua category hrang hranga lang hnem ber an ni. Heng hla lanna langsarte chu Top 100 Songs, Top Selling Song, Top Radio Song, Top Collaboration leh Top Dance/ Electronic Song te a ni.

Drake chu lang hnem ber dawttu a ni. Top Artist, Top Male, Top Billboard 200 Album leh Top Hot 100 Song te chu a lanna langsarte a ni a, a vaiin Drake hi category 13-ah a lang. Twenty One Pilots chu lang hnem pathumna an ni a, nomination 11 an hmu. Top Hot 100 Song-ah Drake leh The Chainsmokers te nen an awm ho a, an album Blurryface chu Top Billboard 200 Album chart-ah a lang bawk.

The Weeknd pawh a lang hnem hle a, a album Starboy chu Top Billboard 200 Album leh Top R&B Album-ah te a lang a, chu bakah chuan Top Streaming Song, Top Collaboration, Top R&B Collaboration, Top Artist, Top R&B leh Top Male Artist-ah te a lang bawk. Hmeichhe lamah Adele leh Rihanna chu an langsar. Billboard Music Awards hi May 21 khian Las Vegas-ah sem a ni ang.