C. Sanga’n a hla up ṭhat a kai tho

Kuminah music video a la tichhuak lo a, tichhuak nise chart lamah pawh kan hmuh ngei tur C. Sanga chuan a hla, a roh leh a dah ṭhat ‘Lungrunpui’ tih hla chu music video-ah siamin a peihfel ta. Music video pawh a hmaa music video a lo siam tawh ṭhin ang lo takin a siam a, a hmuhnawm ang. Tun ṭum chu a music video-ah dancer kan hmu dawn.

C. Sanga chuan, “Music video ka siam tawhte ang lo takin tun ṭum chu ka music video-ah dancer ka nei ve tlat. He hla ‘Lungrunpui’ tih thawnthu mil hian lâm hmangin lem an chang nghal,” a ti. Lungrunpui music video-a lâm hi Mizo Dance Camp-a instructor Zuala leh Chhandami an ni a, choreographer hi Alan Rinawma, Mizo Dance Camp a ni. Video hi Gabriel Graphix kutchhuak a ni a, Thangbawiha’n music track a siam a, Foster-a record a ni.

‘Lungrunpui’ tih hla kum 2004 daiha a phuah tawh kha a ni a, music video-ah a siam har hle a, a dah ṭha rei ngar ngar hle. C. Sanga chuan, “Music video-a ka siam lawk lohna chhan chu a la lai ve deuh rih a,” a ti. “Ka phuah chhuahna hi suangtuahna mai mai a ni lo a, a tak taka thil thleng a nih vang a ni bawk,” a ti. Kum 10 zet a liam hnua music video-a a siam leh chhan pawh sawiin, “Zai thei tawh lo dinhmuna din thut theih a ni. Chutiang hun lo thleng ta se tih ka ngaihtuahin, music video-a siam ngei hi ṭhain ka hria,” a ti. ‘Lungrunpui’ hla hi slow rock lam chi a ni.

Kumina a music video hmasa ber a ni a, a music video tihchhuah hnuhnun chu T. Zorampela hla ‘Chhingkhual lên mawi’ tih leh ‘Kan ram tan i thawk ang u’ tihte kha a ni. ‘Chhingkhual lenmawi’ hla hmang hian kum 2015 June thla khan Ṭhazual Lengzemah pakhatna a luah.