Pencil Entertainment-in Nazareth chungchang buaina an sawi chhuak

India rama Nazareth band chah luttu Pencil Entertainment chuan Aizawla Nazareth band concert neih tura harsatna leh buainate sawi chhuakin, Rocked Live vanga harsatna hi thleng a ni tih an sawi.

Thawhlehni zana Tribal Art Centre, Tanhril-a nazareth concert neih tura hma latu tur chu Rocked Live an nih thu Pencil Entertainment thu­chhuah chuan tarlangin, anni nen hian contract an ziak a, promotion te, production leh thil ṭul ang zawng zawng an buaipui tur a ni. Amahe­rawhchu Rocked Live hian engmah an lo ti lo a, he concert-a zai tur, Empirical Tribe phei chu Rocked Live hian pawisa an lo pek loh avangin an ṭhulh ta a ni. Hetiang a nih tak avang hian Pencil Entertainment chuan Rocked Live chu thawhpui ta loin anmahniin an keng tlang ta a ni.

Hetiang harsatna hi thleng mah se, Pencil Entertainment chuan, "Music kan ngainat avang te, international band hmaa India hmel bâl tur duh loh avangtein engkim, ticket hralh chhuah thlengin ka kalpui ta a ni," an ti. Harsatna thleng mah se, Aizawl mipuite leh mi tlawmngai ṭhenkhatte inpekna avangin Nazareth leh Parikrama chuan an tihlawhtling thei ta tih Pencil Entertainment hian sawi chhuakin, mipuite dawnsawnna ṭha tak avangin an lawm a, Nazareth pawhin Aizawl khawpui an ngainat hle a ni tiin an sawi.