Zorina Sailo Praise On hnua a music video hmasa ber a tichhuak

Praise On-a pahnihna tling pha, Ramhlun North tlangval, Zorina Sailo chuan Praise On hnua a music video hmasa ber chu a peihfel a, MDM Library-ah dahin, Thawhṭanni zan dar 6:50 hian Zonet-ah tihchhuah a ni ang.

Zorina Sailo music video thar hi ‘Fak leh dil hun lawmawm’ tih hla, Kristian Hla Bua mi kha a ni a, he music video hi kum 2003-a boral ta, a pa Saihmingmawia pualin Zorina chuan a hlan. ‘Fak leh dil hun lawmawm’ music video hi SYNFO-in a siamsak.

Zorina Sailo hi music khawvelah chuan mi thar a ni lo. Mizo Idol 2013-14 aṭanga rimawi khawvela kan hriat ṭan kha a ni. Hemi hnu, kum 2015 khan ‘Ka hmangaih hma pawhin’ tih hla a tichhuak a, Ṭhazual chart-ah pawh a lang pha. Nikum khan KHB 181-naa mi ‘Chhandamtu ngilnei chuan’ tih hla music video-in a siam bawk.

‘Fak leh dil hun lawm­awm’ hla hi Zorina music video pathumna a ni. Zorina hian hei chauh hi ni loin, music video dang pawh ruahman a nei mek. Hla pakhat, music video-a siam a tum chu midangin an lo siam avangin a ṭhulh leh a, mahse hla dang a buaipui chho mek. Hla a buaipui mek hi Kings & Prophets-in a produce tur a ni a,hla hi an la final chiah lo. A theih anga ranga tihchhuah erawh a tum.