SEKI Season 2 A hun a thleng dawn ta e

Inter Villge Band Contest SEKI season 2 vawiin hian ṭan a ni dawn ta.

Active Sound bultuma buatsaih SEKI 2022 audition round chu vawiin hian ṭan a ni dawn a, naktuk thlengin audition round hi Vanapa Hall-ah neih a ni ang.

He intihsiaknaah hian veng leh khaw hrang hrang aṭangin band 25 lai an inlan dawn a, intihsiakna buatsaihtute chuan Mizo music industry-a hming langsar tak takte pawh he intihsiaknaah hian kan hmu dawn niin an sawi.

Audition round paltlang band 10-te chu June 30 leh July 1-ah an inel leh dawn a, chutaṭanga band ṭha zual panga thlan chhuahte chuan July 5-ah inelna an nei leh dawn a ni. Grand Finale chu July 8-ah an nei thung ang.

Category pahnih Open leh Under-19-ah an ṭhen hrang a, Open Category-a pakhatnate chuan Rs nuai khat bakah trophy leh citation an dawng dawn a, U-19-a pakhatnate chuan Rs 25,000 bakah trophy leh citation an dawng dawn bawk a ni.