Boss Amanda season 2 a chhuak dawn ta

Boss Amanda season 2 chu zanin hian Runmawi App-ah tihchhuah a ni dawn a, episode 3 a awm ang.

Episode 3 awmna, 'Boss Amanda Damdawi In' season 1 chu tihchhuah a lo ni tawh a, season 2 hi a tawpna tur a nih tawh avangin 'Boss Amanda Phuba' tih a ni a, phuba lakna lam hmuh tur a awm tawh dawn.

Season 1 en tawhte chuan a film kalphung tur an hre nual tawh ang a, a tawp dan tur an hre chak tawh ang. Boss Amanda film-ah hian Zuali Chhangte leh Rintluanga G te chu a changtu ber an ni a, Hospital-a thihna mak tak tak thleng fo mai chungchang an chhuina a ni. Rin phak bakin an thil chhui chu a lo hautak a, mi lian tak tak an lo inrawlh avangin a hautak zual - engtin nge an awm zel tih chu en theihin a awm dawn ta e.

Boss Amanda hi Mawitea Hauchhum (RDS SHOTS) kutchhuak a ni a, a story hi Toni Ralte thuziak 'Boss Amanda' behchhana siam a ni. Runmawi original series a nih angin Runmawi app lamah en theihin a awm ang.