Beatles John Lennon interview-na auction dawn

Kum 1964-a Hull art student pakhatin John Lennon a interview-na record, la tihchhuah miah loh chu vawiin hian lilam a ni dawn.

Interview an neih lai hian John Lennon chuan The Beatles chu musician ṭha tak nia a ngaih loh thu te sawiin, an group tour an neih dawn avanga art exam a neihah a aiah a thianpa a ṭhut thute a sawi.

John Lennon kawmtu, John Hill hi hetihlai hian kum 18 mi niin, Hull Art College-a a zirlai a ni, a interview lai hian microphone keng awmchhun a nih thu a sawi. A record hi drawer-ah kum 50 zet a awm hnuah, kum 2014 khan a hmuchhuak a, Hull antiquities collector hnenah a hralh a ni. Minute riat leh a chanve kawmin, khawiah mah tihchhuah ala ni lo. He tape lilam rual hian recording machine, thlalak leh student magazine article-te pawh an lilam tel nghal dawn a ni.