Taylor Swift hla thar 'Carolina' a chhuak ta

Thla thum vel liam taah khan AMA Artist of the Decade Taylor Swift chuan hla thar a tichhuak dawn tih sawiin a fan-te hmuiah chithlum a lo tat tawh a, nghakhlel taka thlirtu a fan-te chuan nimin aṭang khan chu hla chu an duhtawkin an ngaithla thei ta.

Taylor Swift chuan nimin khan a hla thar ber 'Carolina' chu streaming platform hrang hranga ngaithlak theih turin a chhawp chhuak ta a, he hla hi 'Where the Crawdads Sing' film soundtrack tura a siam niin he film hi July 15 hian tlangzarh a ni thung ang.

Kum 2020-a 'Evermore' album a tihchhuah hnuah khan Swift hian hla thar hlak dang a la tichhuak leh loa, 'Carolina' hi hla thar hlak a tihchhuah leh hmasak ber a ni. A hla hlui a record thar lehte chu a tichhuak ve tawh tho thung a, bonus-track-ah hla a siam tawh sa a la tlangzarh loh han tihchhuah hnuhnawhte pawh a nei tel bawk a, amaherawhchu hla thar hlak erawh a la tichhuak leh meuh lo.

'Carolina' hla hian 'special'-na deuh a nei. Vawi khatah recording an zo vek (One take)! Chumai bakah 1950s chho chiaha awm instrument chiah an hmang bawk.

'Where the Crawdads Sing' film-ah hian 'Kya' lemah Daisy Edgar Jones chu a chang dawn a, Swift hla thar pawh hi Kya chungchang niin an sawi. Kya hi a nu leh pain an tuithlar vanga North Carolina-a amaha khawsa, a hnua a ngaihzawng thattua puh tawk lehzui a ni.

Taylor Swift hi kum 32 chiah la ni mah se kum a tlin hmaa rimawi khawvelin a hmelhriat tawh a ni a, kum 10 chuang chhum lo chat loin a lar tawh tiin sawi ila kan sawi sual awm lo e. Studio album pakua tichhuak tawhin a album tihchhuah tawh pahnih 'Fearless' leh 'Red'-te chu record ṭha lehin a tlangzarh leh tawh bawk. Rimawi lam mai bakah lemchan lamah pawh sulhnu a hnutchhiah nual tawh a ni.