India rama Yamaha hotupain Mizoram Yamaha Blue Square Showroom hawng

India rama Yamaha Motor hotupa ber Eishin Chihana chuan nimin tlaiah khan Thansanga and Sons Auto Division Yamaha Racing, Ramhlun North, Aizawlin changkang zawka showroom an thuam ṭhat Blue Square shop chu a hawng.

Blue Square showroom hi April aṭang khan hmang tawh mah se, Japan mi Chihana chuan nimin khan a vawi khatna atan Mizoram dealer a rawn tlawh a, chutah chuan official-in hawnna a nei a ni. Chihana chuan anmahni dawrtute tana hma lakna a nih thu sawiin Mizote'n Yamaha two-wheeler an ngainat avangin a lawm hle tih a sawi.

Yamaha Motor chuan India ram pumah dealer 100 neiin Blue Square shop nei vek turin a hriattir a, Mizorama bike hralh kawnga hmahruaitu Thansanga and Sons Auto Division hi showroom changkang nei thei 59-na an ni. India ram dealer zingah MT-15 hralh hnem ber a nih bakah R-15 hralh tam pathumna an ni bawk.

Thansanga and Sons Auto Division neitu Robert Lalremruata chuan showroom siam ṭhaa chei thar nan Rs. nuai 60 an seng tih a sawi a, Yamaha Motor India Group of Companies Chairman-in Mizoram ngai pawimawh a, dealer dang tam tak a la tlawh loh laia Blue Square showroom a rawn hawnsak thei chu an ngai hlu hle tih a sawi.