SEKI Season 2 ; Mizoramah rock music a la thi lo

Inter Village Band contest SEKI season 2 chu Ningani liam ta khan ṭan a ni ta a, open category-ah band 25 an inlan.

SEKI band contest atan hian hun eng emaw chen aṭang tawh khan inbuatsaihna kalpui a ni tawh a, veng leh khaw hrang hrang aṭanga he intihsiaknaa tel turte pawh nasa takin an inbuatsaih. Tunah erawh inbuatsaihna hun a liam tawh a, stage chuankai hun a ni tawh thung.

Ningani leh Zirtawpni khan Mizo rock fan-te chuan Vanapa Hall an pan khawm a, an beisei ang an hmuh ngei pawh a rinawm. Blues music aṭanga heavy metal, funk leh punk music aṭanga symphony rock music thlengin ngaihthlak tur a awm. Band 25 ṭha tak tak inlan aṭanga a ṭha zual 10 thlan chhuah leh pawh judge Matilda Amawii (Matilda and the Quest), Bruce Pachuau (Shai Hills/The Breeze), Bobo Renthlei (Stacy's Penitence) leh Patea (Magdalene)-te tan pawh thlan chhuah har tak tur a ni. Mahse thlan chhuah a ngai miau si a, judge-te tan pawh a luhai thlak hle ang.

Top 10-a tling band 10-te hi June 30 leh July 1 hian an inel leh dawn a, chutaṭang chuan Top 5 thlan chhuah leh tur niin July 8-ah grand finale an nei leh dawn a ni.

U-19 category-ah band panga an inlan a, chung band pangate chu vawi thum ṭheuh an inlan anga, chuta an chet ṭhat dan azir chuan result an siam thung ang.

SEKI band contest hi kum 2019 khan buatsaih tawh bawkin khami ṭumah khan Ramhlun South I band Mood Station-te chu pakhatna an ni a, tunah pawh hian Mizorama rock band lar ber pawl niin Season 2-ah pawh hian band ṭha tak an chhuak leh ngei dawn tih a chiang.