Amtea’n a hming a hria! Music video a tichhuak leh ta

Ṭhazual chart-ah pawh pakhatna lo luah tawh Amtea chuan music video thar a tichhuak leh ta a, a music video thar hi ‘A hming ka hria’ tih a ni.

‘Ka thlang ber che’ tih hla hmanga Ṭhazual chart-a pakhatna vawi hnih luah thei Amtea chuan nikum December thlaa a farnu Didiki nena ‘Mari, i hria em?’ tih hla an tihchhuah hnuah Amtea chuan ‘A hming ka hria’ tih hla a rawn peih leh ta. Amtea hla thar hi Francesca Battistelli hla a ni a, ama lehlin a ni. Amtea hian hla a letling fo a, a hla lehlinte hi a nalh hlawm hle.

Amtea hla hi an uluk a, music video pawh a hmuhnawm viau a rinawm. Amtea chuan, “Video kan uluk a, kan bei ngawrh ang reng a, a hla a ṭha a, mahni ralna lam hla a ni ber,” a ti. Track hi BZA, Blue Waves siam a ni a, a hnenah an record a, video hi Andrew kutchhuak a ni. ‘A hming ka hria’ music video hi Amtea tan a music video pangana a ni.

Tuna mi bakah hian hla thar dang a buaipui mek a, he hla hi Mizoram Choir leh Roma te nena an sak tur a ni a, kuminah chuan kan hmu leh hman ngei a rinawm. Hei mai bakah Amtea hian album puitling pawh hmachhawpah a nei reng a, mahse a duh ang erawh chuan a bawhzui chak hman lo. Ph. D a ti mek a, chu bakah chuan zaia chhuahna a nei deuh reng. Tunhnai lawk pawh khan Art & Culture programme-in Gujarat-ah a kal.