'A Song of Ice and Fire' lehkhabu thar nakkumah

'Game of Thrones' author George R.R. Martin chuan 'A Song of Ice and Fire' series parukna tur 'The Winds of Win­ter' chu nakkum lamah chuan peihfel hman a beisei tih a sawi.

GOT fan-te bakah lehkhabu chhiar tuipuitute tan chuan hei hi thu lawmawm tak a ni ang. "Inkhunghran avang hian lehkhabu ziahna hun ṭha ka nei a ni.  ‘The Winds of Winter'-ah hian nikhatah pawh darkar tam tak hun ka hmang ṭhin a, muangchangin hma ka sawn ve zel a ni," tiin Thawhlehni khan a sawi. "Nimin pawh khan chapter pakhat chu ka zo a, ni thum kal ta khan pakhat ka zo tawh bawk a, kar hmasa pawh khan pakhat dang ka zo bawk. Mahse awlsam takin ka zo zung zung dawn tihna erawh a ni lo a, lehkhabu chhah tak a ni dawn a, thui tak ziah tur a la awm," a ti.

Martin chuan tunhnai lawk khan Cersei leh Tyrion Lannister, Asha Greyjoy (GOT-a Yara Greyjoy),  Kings­guard Lord Commander Ser Barristan Selmy leh Sunspear guard captain Areo Hotah-te lanna chapter a zo tih a sawi a, kar leh lamah hi chuan Braavos lanna chapter ziah a tum thu a sawi bawk.

Game of Thrones prequel series tur, House of the Dragon chungchang a sawi lang zeuh bawk a, ṭha taka kalpui a nih thu a sawi a ni. A lehkhabu ziah“Sandkings”, “The Ice Dragon” leh “In the Lost Lands”-te pawh movie-a siam tumna a awm thu a sawi.