Blackpink-in Live countdown buatsaih dawn
Vawiin hian K-pop girl band huhang ngah tak Blackpink chuan an hla thar 'How You Like That' tih chu an tichhuak dawn a, hemi rual hian an fan-te biakpawh pah nan live countdown an buatsaih dawn.
An hla thar an tihchhuah hma darkar khatah Blackpink chuan live countdown hi an nei dawn a, hetiang programme hi a hma pawhin an fan-te nena inkungkaihna ṭha an neih theih nan an lo buatsaih tawh bawk. Countdown hi an ram huna tlai dar 5-ah ṭan an tum a, tlai dar 6-ah an hla thar hi tihchhuah chhunzawm an tum nghal bawk a ni.
Countdown atan hian Blackpink hian activity hlimawm tak tak an ruahman lawk a, an hla thar tur music video behind-the-scene moment-te tihlan an tum bakah an comeback kaihhnawih chungchang eng eng emawte pawh an sawi dawn a nih hmel.
Blackpink hian an ram mai ni lo, khawvel huap ang pawhin huhang an ngah hle. Kar hmasa lawk pawh khan an hla 'As If It’s Your Last' hmangin record an siam a, YouTube-a music video an dah chuan thlirtu maktaduai 800 chuang neiin K-Pop artist zinga hla pali lai thlirtu mtd 800 nei tling thei hmasa ber an ni. YouTube-a an video dah zinga 18 lai chuan thlirtu maktaduai 100 chuang an nei bawk.