Blackface makeup vangin Eiza Gonzalez-in ngaihdam a dil

'Hobbs & Shaw' actress Eiza Gonzalez chuan 'Lola, érase una vez' telenovela-a blackface makeup vangin ngaihdam a dil.

'Lola, érase una vez'-a a thlalak pahnih hi tunhnaiah a lar hle a, hemi vang hian ngaihdam a dil a ni. Kum 30 mi lai ni ve tawh Gonzalez hian Nilaini khan thuchhuah siamin,"Tunhnaia blackface makeup ka inbelna thlalak darh avang hian pawi ka ti hle. Khatih hunlai khan kum 15 chiah ka la ni a,  Mexican telenovela-ah lemchan lama ka hna hmasa ber ka hmu a ni. Ka duh ang ni loin nawr luih ka ni a, sawi theih ka nei lo, a hunlai khan engmah dil theih ka nei lo. Tun ang hian ka duhzawng sawi chhuak thei ila ka ti hle mai.

"Mexican mi ka ni a, immigrant ka ni bawk a, chumi avang chuan thliar hranna leh hnawlna pawh ka nunah ka tawng nasa hle. Midang tina thei a ni dawn tih chu hria ila ka tel ngai lo ang. Ngaihdam dilna mai piah lamah keimahah pawh zirlai ka zir thar phah a ni. Midang ka tina a nih chuan ngaihdam ka dil a ni," tiin a sawi.

Mexican actress chhe lo tak Eiza Gonzalez hi lemchan thiam Timothee Chalamet nen an inngaizawng niin thuthang a awm mek a ni. 'Lola, érase una vez' aṭang hian hriat a hlawh chho ṭan a, 'The Fast and the Furious' spin-off film 'Hobbs & Shaw'-ah khan Madam M lemah a chang a, kumina tlangzarh 'Bloodshot'-ah khan inlan leh bawkin film chhuak thar tur nghahhlelhawm ber zinga mi 'Godzilla vs. Kong'-ah pawh a chang a ni.