Khawvela hmeichhe nalh ber Julia Roberts

Chanchinbu lar People chanchinbu chuan khawvela hmeichhe chhe lo, nalh ber, Most Beautiful Woman a thlang chhuak a, Pretty Woman changtunu, Julia Roberts chu a thlan chhuah a ni.

Kum 49 mi a ni tawh chungin chhuak thar leh naupang zawkten Julia Roberts hi an tluk thei lo. People chanchinbuin khawvela hmeichhe nalh ber a thlan chhuahah hian Julia Roberts hi a vawi khatna chauh a ni lo a, tun hi ṭum nga zet ‘nalh ber’-a thlan a nihna a ni. Kum 1991 kuma nalh ber kha kum 26 a liam hnu, kum 2017-ah pawh a nalh ber. Julia Roberts hi kum 1991, 2000, 2005 leh 2010 te khan nalh bera thlan a lo ni tawh bawk.

Nu upa tawh lam, kum 49 zet a nih tawh hnu pawha People chanchinbuin hmeichhe nalh bera a la thlang fo hi amah Julia pawhin mak a ti a, rin harsa a ti hle. People chanchinbu chuan kum 14 zet pasal a nei tawh a, a nun a hlim a, fa pathum a nei tawh chung leh, a lan upat theih loh chhante pawh a puang chhuak ta tiin a tarlang. Hetiang nun awhawm tak a neih avang pawh hi a ni ang e, khawvela hmeichhe nalh bera thlan a la nih chhan hi.