Victoria Beckham British chawimawina OBE a dawng

Nilaini khan Buckingham Palace, London-ah Victoria Beckham chu British mite an chawimawina, Officer of the Order of the British Empire (OBE) hlan a ni.

Victoria Beckham hi midangte ṭanpuina lam a thawhhlawk avang leh a inpek avanga OBE chawimawina hi pek a ni ber a, he chawimawina hi a pasal, David Beckham hnenah kum 13 kalta khan pek a lo ni tawh bawk. OBE hi Prince William-a kut aṭangin a dawng.

Victoria chuan, “Vawiina Buckingham Palace-a ka awm ve thei hi a ropui ka ti hle. British mi ka ni hi chhuanawm ka ti a, Duke of Cambridge hnen aṭanga OBE ka dawng thei hi phu lo ka intiin, ropui ka ti a ni,” a ti. “Thil lianpui i suangtuah a, rim taka hna i thawh bawk chuan i suangtuah chu i hlen chhuak thei ang,” a ti bawk.

Fashion lama a hnuhma hi kan hriat langsar a ni a, Victoria Beckham hi hetah chauh lo hian, kan hriat langsar loh lamah hna a thawk nasa hle. UNAIDS tana palai a ni a, HIV kai avanga cheksawlh leh endawng tuarte tan hna a thawk nasa hle.

Britain hian civil mi chawimawina chi nga a nei a, OBE an tih, Officer of the Most Excellent Order of the British Empire hi a hniam ber dawttu a ni.

A hniam ber hi MBE an ti a, he chawimawina dawngtute chuan an hming tawpah MBE hi an dah thei. Victoria dawn ang, OBE hi a hniam ber dawttu a ni a, Victoria pawh hian a duh chuan a hming tawpah OBE tih a dah thei. OBE chung chu CBE, Commander of the Order of the British Empire a ni a, hemi dawngtute pawh hian an hming tawpah CBE an dah thei.

Kngiht or Dame Commander of the Order of the British Empire hi chawimawina sang ber dawttu a ni a, hemi chin dawngtute chuan an hming bulah ‘Sir’ an dah thei a, hmeichhia an nih chuan ‘Dame’ tih an dah thung. Knight / Dame Grand Cross of the Order of the British Empire hi a sang ber a ni a, Sir emaw, hmeichhiain Dame emaw an hming hmaah an dah thei