Zaninah PYD Bible Quiz semifinal

Mizoram UPC kohhran ṭhalai pawl, General Pentecostal Youth Department buatsaiha neih mek Bible Quiz chu zanin dar 8:00 hian semifinal neih a ni dawn ta a, Bethlehem Vengthlang PYD, Chawlhhmun PYD, Peniel PYD leh Thingsulthliah PYD te final luh inchuhin an inel ang.

Ignite Studio-a neih tur GPYD Bible Quiz semifinal hi Zonet Zawlbukah live-a pekchhuah tur a ni dawn a, online-a en duh tan General PYD YouTube channel-ah en theiha pek chhuah a ni dawn bawk.

Zaninah hian zaithiam inlan tur an awm dawn bawk a, Pentecost Fak Zai-a top ten aṭangin Michael CR Lalpianfela leh Lalhmingmawii te an zai dawn.

Bible Quiz hi June 9, Ningani zan khan a khuhhawnna neih niin, preliminary round, round of 16 leh quarterfinal-ah te inelna neih a nih hnuin zaninah semifinal neih a ni dawn ta a ni.

PYD Bible Quiz Grand Finale hi June 30, zan dar 8:00-ah neih a ni dawn a, zanin semifinal-a point hmu sang group pahnihin a thiam ber nih an inchuh ang - inelna hi Zonet Zawlbuk leh GPYD YouTube channel-ah bawk pekchhuah tur a ni ang.