TBCA Zaithanpuia YouTube-ah a phalna loa a zai upload a remti lo

TBCA chuan, “Ka hla leh video, ka phalna loa [YouTube-a] lo upload ve tawpho hi request-a paihtir zel turin hma ka la mek. CID (Crime), Police Dept hnenah heng ka hla leh video lo upload ve ringawt ho hi report ka tum,” a ti. Zaithiam leh hla phuahtuten an kutchhuak leh irawm chhuakte humhalh lamah an ṭhangharh mek a, hei hian music industry pawh a tihmasawn ngei ang.

Hetianga hma a lak chhoh dawn takah chuan TBCA chuan, “Ka phalna la lo leh, min dil loa lo upload ho chuan a rang lama lo paih mai turin ka ngen tak meuh meuh a ni. A nih loh chuan an YouTube channel kharsak thlenga hmalak ka tum a ni,” a ti.

Amahin YouTube channel a nei a, hetah chauh hian TBCA hian a zai leh video te a dah lut ang. “Mahni zai leh video bawk ni si lo, ka phalna la lo leh min dil loa lo upload ve ringawt ho hi dan anga hmalak ka tum a ni,” a ti.

TBCA hi MDM hnuaia mi a ni a, MDM-in tunhnai aṭang khan YouTube channel an siam thar bawk. TBCA chuan, “Ka zai bik chu ka channel-ah hian ka dah ang. MDM member-a ka inziah luh nen chuan a indal loin ka hria a, MDM YouTube channel-ah chiah dah lut tura hriattirna engmah kan dawng lem lo,” a ti.

YouTube channel a siam chhan a sawi a, “Ka hla leh zai video te hi quality ṭha taka midang ten an lo en theih nan a ni. Ka duh loh ber chu min dil lem loa quality chhe deuh deuh an lo upload ve tawp tawp hi a ni. Min dilin kan phalna laa upload nise chu kan tan pawh nakin zel atan a hlu viau ang tih chu ka hria,” a ti a, “Keini zai tehlul min lo ngaihlutsaka an lo ngaithla duh anih chuan chu aia lawmawm chu a awm chuang love. Amaherawh chu ka release tawh pawh nise, an lo tawngpawng upload ve ringawt zel hi ka duh lo a ni,” a ti.