MSL Dance Battle Final Crew palite a hriat ta

Mizoram Super League Season 3 khelh mekah kum danga an lo neih ṭhin angin Halftime Dance Battle chu semi final aṭanga neih ṭan leh a ni dawn a, heta inel turte pawh a hriat theih ta.

MSL Dance Battle atana March thla aṭanga video audition an buatsaih ṭan tawh chu kar hmasa khan tihtawp a ni a, crew 10 chuang form la zingah crew pali thlan chhuah an ni. Heng Crew te hi Climax Fabulous, GOV, Dem Boys leh Emerge te an ni. Kumin dance crew member te hi mipa hlang vek an ni a, kum dang angin MSL crew leh cheerleader-ah a tel kawp theih tawh loh avangin, Mizo hmeichhe lâm thiam chu Cheerleader an ni vek thung.

MSL Crew te hi Semi Final ṭan zan May 4 aṭangin halftime-ah an rawn intihsiak ṭan dawn a, zan khat­ah crew hnih zel an lâm ang. Crew tin te hi vawi hnih ṭheuh an rawn lâm chhuah hnuah, crew ṭha ber pahnih thlan chhuah an ni ang. Heng crew pahnih thlan chhuah te hi an intihsiak leh hnuah MSL Season 3 Dance Battle Champion chu hriat a ni tawh dawn a ni.

MSL Dance Battle Champion hian Rs. 20,000 leh certificate a keng tel a, pahnihnain Rs. 10,000 leh certificate, pathumna leh palina hian Rs. 5,000 ve ve an dawng thung ang. Judge turte hi season 2-a mi ang thoin Alan Rinawma, Nutei Pautu leh Steve Lalruatkima te an ni ang.

MSL Crew te hian an vaiin Final zanah an perform-ho dawn a, Mizo mipa 20 rual rawn lâm tur hi en chakawm tawh tak a ni.