'Elvis' a rawn lar thar leh e

Box Office-ah Austin Butler channa 'Elvis' chuan sum a lalut tam ber a, he biographical musical drama film hian kar tawp liam ta chhung theatre 3,906 aṭangin $31,211,579 lai sum a lalut.

Elvis Presley biopic 'Elvis' hi critics lamin an fak angreng hle a, a bik takin Austin Butler chevel chuan fak a hlawh zual. Elvis-a fanu Lisa Marie Presley chuan Austin Butler chu nasa takin a fak a,"Ka pa rilru leh thlarau mawi takin a rawn lan chhuahtir ani. Ka ngaihdan tlawm takah chuan a performance kha kan la hmuh ngai loh niin a dik (accurate) viau bawk a ni," tiin a sawi hial.

He film hian Rotten Tomatoes lamah rating 6.8/10 a hmu a, critics 271 review aṭangin hetiang zat ratings hi a hmu thei a ni. US pawn lamah $20,000,000 lalut bawkin a sum lakluh tawh zawng zawng zat chu $51,211,579 a ni tawh.

$tluklehdingawn thlawh khumtu 'Top Gun: Maverick'
North America Box Office-a pahnihna ni mek 'Top Gun: Maverick' chuan kar tawp liam ta chhung khan Box Office aṭangin $29,614,139 lai sum a lalut leh a, a sum lakluh tawh zawng zawng chu $1,006,936,963 lai a ni der tawh.

Kumin chhunga film tlangzarh hlawhtling ber ni mek 'Top Gun: Maverick' hi kumina film tlangzarh zinga $tld lalut tling thei film hmasa ber a ni mek bawk.

'Jurassic World Dominion' chu chart-ah pathumna a ni a, kar tawp liam ta chung khan $26,729,510 lai sum a lalut leh a ni. Film thar 'The Black Phone' chu palin a ni bawkin film thar tho 'Jug Jugg Jeeyo' chu pasarihna niin top 10-a lang thei film thar zingah a tel a ni.