Gaming News ; July thlaa game tlangzarh tur langsar zual ṭhenkhatte chu...

Gamespot.com chuan game hrang hrang tlangzarh hun tur leh tlangzarh hun la tihchian loh eng emaw zat list a tichhuak a, July thla chhung pawh hian game khelh chakawm tak tak tlangzarh tur a awm nual mai.

Intlansiak, a bikin Formula One leh Formula 2 championship lam tuipuitute tana thu lawmawm chu July kan chuankai rual chiah hian F1 22 chu an tlangzarh dawn a, kumin aṭang hi chuan Steam aṭang ringawt ni lo, EA Origin platform aṭang pawhin a khelh theih tawh dawn a ni. He game bakah hian Forza Horizon 5 Hot Wheels DLC chu July 19-ah tlangzarh a ni dawn bawk. Racing game tuipuitute tan thu lawmawm a ni ang.

Adventure lam hawi hun eng emaw chen aṭanga thawm nei ve reng tawh As Dusk Falls chu July 19-ah tlangzarh a ni dawn a, survival strategy role-playing game, anime fan-te hriat zawng tak tur Digimon Survive chu July 28-ah tlangzarh a ni dawn bawk. Nintendo Switch lama game lar tak Xeno franchise game Xenoblade Chronicles 3 chu July 29-ah an tlangzarh dawn bawk a ni.