Billboard Hot 100 chart-ah Kendrick Lamar

Kendrick Lamar hian album thar a tichhuak a, a album thar hi Billboard 200 chart-ah pakhatna a ni nghal a, he album-a hla ‘Humble’ pawh pathumna aṭangin pakhatnaah a rawn kai. Kendrick Lamar hian Hot 100-a pakhatna luah thei hla a neih pa­hnihna a ni a, ‘Humble’ hla hi ama solo-a pakhatna a luah vawi khatna a ni.

Chawlhkar 12 chhung zet Hot 100-a pakhatna luahtu Ed Sheeran hla ‘Shape of You’ chu Kendrick-a hla hian a rawn hmakhalh. Lamar hla ‘Humble’ hi Hot 100 chart-a pakhatna luah thei hla 1,062-na chiah a ni. Billboard Hot 100 chart hi kum 1958 August 4 aṭanga tihchhuah ṭan a ni.

Streaming lamah chuan Humble hla hi pakhatna a ni a, April 20 chawlhkar chhung khan US-ah vawi maktaduai 67.4 zet stream a ni. Hot Rap Songs chart lamah chuan chawlhkar thum chhung pakhatna a luah ta a, Hot R&B/ Hip Hop Songs chart-ah chawlh­kar hnih chhung pakhatna a luah ta bawk. Humble hi Lamar album thar DAMN-a a lead single a ni.

Kendrick Lamar hi Rapzilla chuan Kristian rapper hlawhtling niin a tarlang. Hetiang hi a nih avangin a album DAMN pawh hi Kristiannaa thil pawimawh tak tak, khawtlang leh mimal nuna thil ṭha inzirtirna a ni e an ti. A hma pawhin Kendrick hian amah chu Pathian hmanrua mai a nih thu a lo sawi fo tawh ṭhin. Lamar hian Pathian chu mihringte chetla leh thil thleng entu ringawt a ni lo a, mihring nunah hian a che a, thilsiamah hian a che vel a ni tih a pawm. Chance The Rapper-a'n Grammy a dawn pawh khan Lamar hian, "Pathian a che a ni" a ti.