Beyonce ‘Lemonade’ an hralh hnem ber

International Federation of the Phonographic Industry (IFPI) chuan kum 2016 chhunga album hrang hrangte hralh hnem dan an tarlang a, chutah chuan Beyonce album Lemonade chu album hralh hnem ber a ni a, Adele leh Drake te pawhin an tluk lo. Drake hi hla mal hralh hnem lamah chuan a chungnung ber thung a, IFPI chuan Global Recording Artist of the Year-ah a puang; mahse hla mal hralh tam lam zat erawh tarlan a ni lo.

Beyonce album Lemonade hi copy maktaduai 2.5 khawvel pumah an hralh a, Adele album 25 chu copy mtd 2.4 an hralh. Drake album Views chu album hralh hnem pathumna a ni a, copy mtd 2.3 an hralh a, Metallica album Hardwired...to Self-Destruct chu copy mtd 2.1 lai an la hralh thei. David Bowie chu hralh hnem pangana a ni a, copy mtd 1.9 an hralh. The Rolling Stone album ‘Blue & Lonesome’ te, Bruno Mars album 24k Magic te, Twenty One Pilots album Blurryface, Coldplay album ‘A head full of Dreams’ leh Pentatonix album ‘A Pentatonix Christmas’ te chu album hralh hnem 10-a langte an ni.

US-ah erawh chuan album hrang hrang hralh belhkhawmah Beyonce te, Drake te ai hian Prince album-te an hralh hnem ber thung. Prince album hrang hrang hi nikum chhung khan US-ah maktaduai 2.3 an hralh. Prince album zingah The Very Best of Prince hi an hralh hnem ber a, copy 668,000 lai an hralh a, Purple Rain chu copy 498,000 hralh a ni a, 1999 album chu copy 169,000 an hralh.

Nikum chhung khan kum 2015 nena khaikhinin khawvel pumah music business a ṭhang a, a ṭhanna hi za zela 5.9 lai a tling. IFPI-in kum 1997 aṭanga khawvel music industry an thlir aṭangin a zawna kum hnih a ṭhanna a ni a, a hma kum 15 chhung erawh chu a tlahniam thung.