Thing tuk chawp mic stand nena hlawhtling Tribal Power

Mizo music chanchin sawi chuan band hlawhtling, Tribal Power hi a ri ring berte zinga mi a ni. Zo rimawi khawvela hlawhtlinna chang tura an bul ṭanna a ropui lo a, mic stand pangngai pawh nei pha lo kha tuichilhna leh thawhrimna avangin band hlawhtlingah an rawn inhlangkai.

Mizoram mai ni lo, North East Beat Contest-a pakhatna ni thei Tribal Power hi an neu lo a, an bulṭanna erawh thil nep ve tak tak tho a ni. An frontman, Lalawmpuia Ralte, OPA chuan, “North East Beat Contest-a tel tura kan inpuahchahnaah te hmanrua kan nei chhe hle. Mic stand tur pawh kan nei lo a, thingin kan tuk chawp a ni,” a ti. Hei hi kum 1996 kha a ni. OPA chuan, “Khami ṭum khan hlawhtling tlak kan niin ka hria a, kan hla zirte pawh a har a, kan bei nasa a ni,” a ti. Hemi ṭum hian tun thlenga Mizorama band larte zinga mi Dreamhunter chu pa­hnihna an ni.

Tribal Power band hi kum 1995-a din kha a ni a, Maitawka a thi tawh a, OPA, Truman, Remsangpuia, Maduhawma te an ni a, Maitawka ai hi VLA’n a awh. Tepuia, Sanglura Renthlei, Sangkima Renthlei te tuna an band member an ni.

Band angin Tribal Power hian album pa­hnih an tichhuak a, OPA hian solo album ‘Pu Beng­khuaia Lehkha’ a tichhuak bawk. Tribal Power album hmasa ber, kum 1995-a an tih­chhuah, Tribal Power hi a hunlaia album hit ber a ni a, copy 50,000 chuang zet an hralh! Tun­laia kan music industry en chuan copy 50,000 hralh tlin hi chu beisei phak a ni ta lo, a pawi zawk ta hle. He­mi hnu hian ‘Inhlanna’ album an tichhuak leh bawk. OPA hian a solo album ‘Pu Bengkhuaia Lehkha’ hi copy 30,000 chuang a hralh leh bawk.

An hla hit zinga pakhat, chanchin ngah ‘Dolma’ phuah a nih dan chanchin Vanglainiin a zawhnaah OPA chuan, “A...sawi vak hi ka duh lo,” a ti. Dolma phuah dan chanchin a sawi

chiang duh lo. OPA chuan Mizoram hmun hrang hrang­a concert tour an neih tawhah Kolasib-a an concert chu chhin­chhiahtlak lehzual a nih thu a sawi. Tribal Power hian music an la chawlh­san lo a, tun thlengin hmun hrang hrangah an la zai a, hman ni lawka MZU-a Vibrio-ah pawh khan an la perform. Hla thar tihchhuah pawh an tum a, tuna an hla thar tur erawh a music a dang dawn. OPA chuan, “Tribal Power music lo deuh a ni ang. A hmaa kan music te nen chuan a dang hlak ang,” a ti.

OPA chuan, “A tawpa bera ka sawi duh chu Mizo hla hi a zahpuiawm lo tih hi a ni. Ka harh chhuahna chu Mahatma Gandhi ziak ‘Imitating the English Gentleman’ tih kha a ni," a ti a, Mizo chu Mizo taka awm mai a ṭha a ti a, "Kan concert neih ṭhin tawhah pawh Mizo hla sak a nuam ber a, mipui nena kan sak tlan theih hla hi a lo hlu ber mai,” a ti.