Bollywood actor lar Vinod Khanna thi

Nu leh pa tam takin an vanglaia a channa an en nasat, Bollywood actor Vinod Khanna chu nimin chawhma dar 11:20 khan cancer natna avangin Girgaun, Mumbai-a HN Reliance Foundation and Research Centre-ah a thi.

Vinod Khanna hi March 31 khan dehydration nasa avangin damdawi inah hian dah luh a ni a, a phîng cancer avangin a hma aṭang tawhin an lo enkawl tawh ṭhin a, a natna tuar loin kum 70 mi niin a nun a thlah ta a ni. Khanna hian a nupui, Kavita leh a fate pali - Rahul Khanna, Akshaye Khanna, Sakshi Khanna leh Shraddha Khanna te a kalsan. Film chan a chawlhsan hnuah Khanna hi politics-ah a lut a, BJP MP (Lok Sabha) niin, kum 2014 khan an thlang tling leh a ni.

Kum 1968 aṭang khan film a chang ṭan a, a channa hmasa ber hi Man Ka Meet a ni a, a chan hnu­hnun ber chu kum 2015-a mi Dilwale kha a ni. A changtupa bera a channa hmasa ber chu Hum Tum Aur Woh kha a ni a, acting khawvel­ah a hlawhtling hle a, kum 1974-82 chhung phei kha chuan Jeetendra te, Amitabh Bachchan te ai pawhin a hlawh hnem zawk. Kum 1987-95 chhung pawh khan hetih hunlaia actor lar, Sanjay Dutt, Rajnikanth, Salman Khan, Rishi Kapoor te aia hlawh hnem a ni ṭhin. Bollywood milarten a thi tih an hriatin an ui thu an sawi chhuak a, a kalsan tak a chhungte an thlamuan bawk.