Billboard ; Drake-a'n a album thar hmangin ro a rel

Candian artist Drake chuan 21 Savage a thawhpuina hla 'Jimmy Cooks' chu Billboard Hot 100 chart-ah pakhatna a ni.

Drake hian June 17 khan a album thar ber, a studio album pasarihna 'Honestly, Nevermind' chu a tlangzarh a, 'Jimmy Cooks' pawh hi chu album-a mi chu niin he hla hmang hian mel lung pawimawh tak Drake hian a phum nghal.

Eng mel lung pawimawh maw? A chhanna chu hei hi a ni. Drake hian heti hian Hot 100 chart No.1 hla 11 a nei chiah a, 21 Savage tan hian a pahnihna a ni thung. Heti hian Drake hi Hot 100 No.1 hla nei tam parukna a ni chiah a, Whitney Houston nen an dinhmun a inang chiah bawk.

'Jimmy Cooks' chiah hi Hot 100 top 10-a a lanpui hla a ni lo. 'Sticky' leh 'Falling Back' chu lanpui bawkin parukna leh pasarihna a ni.

Billboard 200 chart lamah pawh Drake tho
Drake hian Hot 100 chart chiah hi a thunun lo. A album thar 'Honestly, Nevermind' chu Billboard 200 chart-ah pakhatna a nihpui bawk a, Bad Bunny 'Un Verano Sin Ti' leh Harry Styles 'Harry's House'-te chungah a awm.

Heti hian Billboard 200 leh Hot 100 chart-ah a rualin vawi hnih pakhatna a ni chiah bawk a, hetiang tithei hi mipa artist dang zingah an la awm lo. Nikum September 18 khan Certified Lover Boy leh 'Way 2 Sexy' hmangin heng chart ngaihhlut pahnihah hian pakhatna a lo ni rual tawh bawk a ni.

Artist 100 chart lamah pawh Drake hi pakhatna a ni tel a, single chart dangah erawh Harry Styles 'As It Was' bawk la hit chhunzawmin Billboard Global 200, Billboard Global Excl. US leh Songs of the Summer chart-ahte Harry Styles hi pakhatna a ni leh.

The Hot 100 top 5:-
1 Jimmy Cooks Drake Featuring 21 Savage
2 As It Was Harry Styles
3 First Class Jack Harlow
4 Wait For U Future Featuring Drake & Tems
5 About Damn Time Lizzo

Billboard 200 chart top 10:-
1 Honestly, Nevermind Drake
2 Un Verano Sin Ti Bad Bunny
3 Harry's House Harry Styles
4 Proof BTS
5 Dangerous: The Double Album Morgan Wallen
6 I Never Liked You Future
7 Twelve Carat Toothache Post Malone
8 Khaza Kevin Gates
9 Mr. Morale & The Big Steppers Kendrick Lamar
10 Sour Olivia Rodrigo