Zaninah PYD Bible Quiz Grand Finale

General PYD, Mizoram UPC buatsaiha neih mek Bible Quiz Grand Finale chu zanin dar 8:00 hian neih a ni dawn ta a, Bethlehem Vengthlang PYD leh Thingsulthliah PYD ten a thiam zawk nih an inchuh dawn - Zonet Zawlbuk leh General PYD YouTube channel-ah live-a en theih a ni ang.

Ignite Studio-a neih mek PYD Bible Quiz hi Thawhlehni zan khan semifinal neih a ni a, Bethlehem Vengthlang PYD, Chawlhhmun PYD, Peniel PYD leh Thingsulthliah PYD ten inelna an neih hnuah point hmu sang pahnih Bethlehem Vengthlang leh Thingsulthliah hian final an lut ta a ni.

Bible Quiz Grand Finale-ah hian zawhna pangngai piah lamah rapid fire, audience, visual leh audio hmangtea inelna neih a ni leh dawn bawk a, zaithiam zai ngaihthlak tur a awm dawn bawk.

Pentecost Fak Zai top three aṭangin, pakhatna C.Lalhriatkimi, pahnihna Rebek Vanlalnunpuii leh pathumna Vanlalduhsaka-te an zai dawn a ni.