SEKI SEASON 2 Zaninah Top 10 inelna zo dawn

Active bultuma buatsaih Inter Village Band Contest SEKI Season 2 top 10-a inhlangkaite chu nizan khan an inlan tawh a, zaninah an inlan leh dawn, chutaṭanga band ṭhazual thlan chhuah pangate chu karleh Thawhlehni hian an intihsiak leh dawn a ni.

Vanapa Hall-a buatsaih mek SEKI band contest open category top 10-a tlingte leh U-19 te chu nizan lamah khan hla inang pahnih hmangin an inel tawh a, zaninah erawh an hla duhzawng ṭheuh an sa thung ang. Open category Top 10-te hi Realistic hla hit tak mai 'Van In' leh Triau Trackx hla hit 'Ka lo nghak reng ang che' hmangin nizan lamah khan an inel a, U-19 top 5-te chu Drop Doubt hla 'I tan ka hlan' hmangin an inel ve thung.

Zaninah hian dar 7:30 aṭangin intihsiakna an ṭan leh dawn a, a hmuna chhim duh tan ticket pakhat Rs 50 leka leiin a chhim theih dawn bawk. Ticket hralhna aṭanga an sum hmuh chhuah hi 'charity' atan an hmang dawn nghe nghe a ni.

A hmuna chhim thei lo tan TV lamah a thlir theih dawn. LPS HD-ah a en theih dawn bakah K&P YouTube channel lamah pawh live-in an pe chhuak ang.

SEKI 2022 U-19 result hi karleh Ningani, July 7 zanah hian an puang dawn a, hetah hian Mizo artist ṭha tak takte an inlan dawn bawk. July 8, Zirtawpni zanah Open Category result puan a ni dawn thung a, hetah pawh hian Mizo artist lar eng emaw zat an inlan leh dawn bawk a ni.