PYD Bible Quiz: Bethlehem Vengthlang an thiam ber

Mizoram UPC kohhran ṭhalai pawl, General Pentecostal Youth Department buatsaiha neih, PYD Bible Quiz chu Ningani zan khan a hmawr bawk a ni ta a, Bethlehem Vengthlang PYD aia thiam zawk an awm lo.

Ignite Studio-a neih PYD Bible Quiz Grand finale-ah hian Bethlehem Vengthlang PYD leh Thingsulthliah PYD te an inel a, Bible chhung aṭanga zawhna piahlamah hian visual round leh audio round hmanga inelna neih tel a ni a, audience round a awm bawk.

Team pahnihte an inlehthal zak zak hnuah, a tawpah Bethlehem Vengthlang PYD an chungnung ta zawk a, point 220 an hmuh laiin, Thingsulthliah hian point 170 hmuin an phak ta lo a ni.

Bethlehem Vengthlang PYD aiawh hian PC Vanlalhriata leh C. Lalramthara an inlan a, anni pahnih hi Apostolic Theological Institute aṭanga zir chhuak ve ve niin, Thingsulthliah aiawha inlante hi Lalbiakthianga leh R. Lalmuanawma te an ni thung.

Grand Finale-ah hian Pentecost Fak Zai top three aṭangin C. Lalhriatkimi, Rebek Vanlalnunpuii leh Vanlalduhsaka te an zai bawk a, mit leh beng a tlai hle.

Bible Quiz hi June 9 khan a khuhhawnna neih niin, preliminary round, round of 16, quarterfinal leh semifinal-ah te inelna neih a nih hnuin a tawpah BVT PYD leh Thingsulthliah ten a thiam ber nih an inchuh - inelna hi GPYD YouTube channel-ah live-a pekchhuah ṭhin a ni a, semifinal aṭang hian Zonet Zawlbukah pekchhuah a ni bawk.

PYD Bible Quiz-ah hian Bethlehem Vengthlang PYD aiawha inlan C. Lalramthara chu zawhna chhang dik hnem ber niin, zawhna 43 a chhang dik a ni - Genesis, Exodus, Thupuan, Chanchinṭha Johana, Rom, Hebrai leh Tirhkohte Thiltih aṭangin inelna hi neih a ni.