Friends: a 'diverse' tawk lo em ni? Friends co-creator Marta Kauffman-i'n thupha chawi!

Khawvela sit-com hit ber zinga mi Friends co-creator Marta chuan Friends-ah khan hnam/chi hrang hrang an inpawlh tawk lo tih chu a pawm thu sawiin, thupha a chawi. Chumai chu a la duhtawk lo! Thupha chawina turin a 'alma mater', Brandeis University-a African leh American-African studies department tan $maktaduai 4 a pe dawn bawk.

NBC series hi mi tam takin a 'diverse' tawk lo niin an sawi tawh ṭhin a, mahse showrunner lam chuan hei hi kum tam tak chhung an ngaipawimawh duh lo. Amaherawhchu, June 29 khan Friends co-creator Marta Kauffman chuan The Los Angeles Times hnenah an show-ah chuan hnam/chi hrang hrang an inpawlh tawk lo tih chu a pawm tih a sawi a, thupha chawina atan pawisa tam tak a theh chhuah dawn thu hi a sawi bawk.

"Mahni thiam lohna pawm hi thil harsa tak a ni. Darthlalanga mahni inen hi a hrehawm. Kum 25 liam taah ka lo hre chiang lo kha zahthlak ka ti," tia sawiin hun kal tawhah chuan awmze nei loah an show chu miin an sawisel ṭhin nia a ngaih thu sawiin, "George Floyd chunga khatiang thil a thlen hnu khan tunhmaa ka la ngaihtuah ngai loh racism chungchangah ka ngaihtuahna nasa takin a insual ta a ni. Chumi hunah chuan ka tel vena chin chu uluk takin ka inenfiah ta a. Ka kawng zawhah siam ṭhat ngai a awm tih ka hre ta a ni," a ti.

Friends zet kha chu
Kum 1994-2004 inkara tihchhuah niin khawvela television show lar ber pawl a ni. Primetime Emmy Awards-ah nomination 62 tehmeuh a hmu hman a, kum 2002 khan Outstanding Comedy Series award a dawng hial.

Season 10 awmin episode 236 a awm a, a changtu ber paruk- Jennifer Aniston, Courteney Cox, Lisa Kudrow, Matt LeBlanc, Matthew Perry leh David Schwimmer-te chu vawiin thlenga lemchan khawvela huhang ngah ber zinga mi an la ni reng. Season zawng zawng kha entu maktaduai 20 aia tlem an awm ngai loa, season 2 phei chu entu maktaduai 30 chuang an awm anga chhut a ni.

Friends episode 236 zinga en hlawh ber chu Season 2-a mi "The One After the Superbowl" kha niin mtd 52.9-in an en anga chhut a ni a, episode hnuhnung ber "The Last One" kha mtd 52.5 velin an en anga chhut a ni bawk.

"Mahni thiam lohna pawm hi thil harsa tak a ni. Darthlalanga mahni inen hi a hrehawm. Kum 25 liam taah ka lo hre chiang lo kha zahthlak ka ti," - Marta Kauffman