SEKI 2022 Open Category top 5-te a hriat ta

Inter Village Band Contest SEKI season 2 kal mekah kar liam ta Ningani leh Zirtawpni zanah khan Open Category Top 10-te leh U-19-a telte chuan Vanapa Hall-ah inelna an nei leh a, tunah chuan top 5-a inhlangkaite a hriat theih ta.

Chanmari West LC, Chanmari West LC Polysphere, Electric Veng LC, Ramthar Veng LC leh Serkawn VC, Lunglei-te chu Top 5-ah an inhlangkai a, July 5, Thawhlehni lo awm tur zanah hian an inel leh dawn.

Ningani liam ta zanah khan top 10-a tlingte chu hla thlan bik (Common song) hmangin an inel a, Zirtawpni zanah khan an hla duhzawng ṭheuh an sa leh bawk. Band inlan an ṭha rual tawh a, inelna boruak a sangin a thiam pawh an thiam tlang hle. Chung zingah chuan heng band kan tarlan tak pangate hi inelna hmachhawn zui turin judge-te chuan an thlang ta a ni.

Ningani lo awm tur zanah hian U-19 category result puan a ni dawn a, hetah hian Mizorama artist leh band ṭha ber ber chu an inlan dawn a, Result puanna chu concert-in a zui dawn a ni.

Zirtawpni zanah open category result puan tur niin hei pawh hi concert-in a chhunzawm bawk ang.

SEKI Season 2 top 5:-
- Chanmari West LC
- Chanmari West LC Polysphere
- Electric Veng LC
- Ramthar Veng LC
- Serkawn VC, Lunglei