Michael M. Sailo A hla hnuhnung ber an tlangzarh

Mizo rapper leh Mizote music ṭha tak tak min hluitu, ui tak chunga Mizo mipuitena kan thlah liam tak Michael M. Sailo chu a hla record hnuhnung ber chu Inrinni zan khan MSL khelhnaah tlangzarh a ni.

April 7 zana hun lo taka he khawvel chhuahsan ta, Michael M. Sailo hla thar an tihchhuah hi ‘Thinlai Hnemtu’ tih a ni a, YouTube-ah pawh dah luh a ni a, darkar 24 chhungin mi 6000 chuangin YouTube-a dah hi an en hman. Release-naah hian Michael M. Sailo nupui SPI (B. Malsawmtluangi) leh an fate pahnih - Brooklyn Lalsangkima Sailo, kum 7 mi leh Marshall Lal­hruaizela Sailo, kum 5 mite kan hmu. Teruata Ralte sponsor a ni.

‘Thinlai Hnemtu’ tih hla hi B. Puia Zai-Awi leh PL Engmawia te phuah a ni a, music hi Hruaia CZ siam niin, Spaceville Pro-Session-a an record a ni. Video hi Bertinax Visual kut­chhuak a ni. He hla hi a thih hma, April 5 khan Michael M. Sailo hian a record zo hman a, April 12-a video shooting nei tura an inbuatsaih lai mek a ni. Amaha a awm ta lo mah se, a hniak hnuhnung a nih tak avangin music video hi buatsaih chhoh a ni ta tho a, video-ah hian Michael M. Sailo thlalak dah a ni ta thung.