Temi Sailo kumina a hla thar hmasa ber

‘Kraws thu’ hmanga kan hriat lar, Temi Sailo chuan kumina a music video hmasa ber tur chu a peih fel leh ta a, Zonet-ah pawh a dah thuai dawn.

Temi Sailo hla thar ‘I thiam an hril ṭhin’ tih a ni a, hla lehlin a ni a, letlingtu hi Muana Pachuau a ni. Music hi EFX Audio a ni a, he hmunah hian a record nghal; wardrobe hi POZ-in a tum a ni. Video hi Mspace kutchhuak a ni.

Temi Sailo tan tuna a music video thar ‘I thiam an hril ṭhin’ tih hla hi aman a siam liau liau zinga a music video pathumna tur a ni. ‘Kraws thu’ kha ama puala a music video hmasa ber a ni a, a hlawhtling hle a, Ṭhazual chart-ah pawh pakhatna a luah hial. Hemi hnu hian ‘Ka lungawina Isua’ tih music video a siam leh a, hei pawh Ṭhazual chart-ah kan hmu a nih kha. Tuna mi pawh hi beisei a sang viau a, amah a zaithiam bakah a hla a ṭha hle.

A hla thar chungchangah Temi Sailo chuan, “Pathian thilsiam ropuizia leh a thilsiam ten an theih anga an chawimawizia chungchang a ni” a ti. “He hla kan shoot lai pawh hian a thilsiama chungnung ber mihringte zawk hian min siamtu hi kan va han chawimawi tawk lo ṭhin êm tih hi ka rilruah a awm a; Ama thilsiam ten heti khawpa hlimna min pek theih chuan he nunna hlu tak min petu leh a thil siama ropui ber mihring te hian a duhzawng kan tiha a ropuizia kan lan chhuahtir hian min siamtu Pathian hi a va lawm dawn em tih hi ka rilruah he hla aṭang hian a awm a ni,” a ti. Temi chuan, “Kan theihnate pawh a inang lovang, amaherawh chu min siamtu Pathian hian kan theih dan kawnga chawimawi let ve hi a phu a ni,” a ti a, he hla lo ngaithla turte pawhin hian hetiang zawnga an lo ngaihthlaka malsawmna he hla hmanga an lo chan ngei a duh hle.