Avatar 4 & 5: James Cameron-a'n a direct lo mai thei!

Avatar director James Cameron chuan Avatar 4 leh 5 a direct tawh lo mai thei!

Khawvela film tlangzarh tawh zawng zawng zinga sum lalut tam ber ni mek Avatar director James Cameron hian tunah hian 'Avatar: The Way of Water' chu kum tawpa tlangzarh mai turin a peihfel deuhthaw tawh a, hemi rual hian a chhunzawmna tur Avatar 3 chu a buaipui mek bawk. Hetih mek lai hian film hlawhtling tak Titanic siamtu hian thildang tihtur a neih avangin Avatar 4 leh Avatar 5 erawh a direct zui tawh lo mai thei niin a sawi.

Empire hnenah hemi chungchang hi sawiin Cameron chuan,"Avatar film ho hrim hrim hian tha leh hun a heh hle. Thildang phurawm tak tih leh buaipui mek ka nei bawk. Hun eng emaw chen chu ka ngaihtuah tawh a, pathumna emaw palina emaw zawhah hi chuan director tiang hi midang ka rin zawng tak hnenah hlan chhawn ka duh a ni. Chu chu ka duhzawng thildang ka tih theihna tur a ni. Mahse a thleng kher lo mai thei a, ka sawi lawk thei bik lo," tiin a sawi a ni.

Cameron chuan Avatar 3 chu tihchian a ni tawh tih sawiin a chhunzawmna dang siam erawh sum an hmuh danah a innghat thui hle tih sawiin, Avatar 4 leh 5 erawh thawnthu lian tak pakhata bet tlat an nih avangin siam ngei a beisei thu a sawi bawk.

Teaser-te pawh hmuh tur awm tawh 'Avatar: The Way of Water' hi December 16-ah tlangzarh hman an tum a, $maktaduai 250 vel lai sengin an siam a ni.

James Cameron-a film direct tawh langsarzual ṭhenkhat:-

1984 The Terminator

1986 Aliens

1991 Terminator 2: Judgment Dayte

1994 True Lies

1997 Titanic

2009 Avatar