Aziri Pakhatnaah bawk a chuang leh Aizawl FC an champion a lawmpui

Mizo Idol 2013 aṭanga kan hriat Aziri bawkin Ma-i Store Ṭhazual Lengzem chart-ah pakhatna a luah leh a, tun hi a vawi hnih luahna a ni. Aziri hian I-League-a Aizawl FC an champion pawh a lawmpui.

Aziri hian ‘Engvang­in nge?’ tih hla hmangin a zawnin pakhatna hi a luah leh a, a beisei ngam loh hmunah a zawnin vawi hnih a awm ta. “Pakhatna han nih hi chu ka beisei ngam lo. Ka music video hi uluk tak chuan ka siam a, han siam takah chuan eng emaw tal ni pha ve tura tih kha ka duh a ni,” a ti. “Amaherawhchu tunlaiin zaithiamte an thiam tawh a, an music video a ṭha thei bawk sia, pakhatna êm hi chu ka beisei ngam chiah lo,” a ti.

I-League-ah Mizoramin history siam a, India hmarchhak club aṭanga I-League champion hmasa ber kan nei ta chu a lawm ve hla. “Aizawl FC hi ka ṭan a, an inkhel ka en ve tawh chuan ka au ve nasa ṭhin,” a ti a, “Champion an han ni ta pawh hi ka lawmpui em em a ni,” a ti. Aziri hian music video pawh la siam chhoh zel a tum a, tun tut tutah erawh chuan hma lak nghal a tum lem lo.

Caseys Secret-in hma an rawn sawn nasa a, pangana aṭangin pa­hnihnaah an rawn chho. Caseys Secret hla hi ‘Duh­aisam’ a ni a, hma an sawn chak dan en hian pakhatna an rawn luah mai pawh a beiseiawm.

Mathlenga hla thar ‘Zawlkhaw dingdi’ pawh pathumnaah a rawn kai a, Intonation hla ‘Tlai khat’ chu palinaah awmin, Feli Fanai hla ‘Theih chang se’ chu pahnihna aṭangin panganaah a chhuk. Top 10 aṭangin Grace-i hla ‘No Khat’ a chhuak a, C. Sanga hla ‘Lungrunpui’ chu pariatnaah a rawn lang thar.

Ma-i Store Ṭhazual Lengzem

1 Aziri

- Engvangin nge

2 Caseys Secret

- Duhaisam

3 Mathlenga

- Zawlkhaw Dingdi

4 Intonation

- Tlai khat

5 Feli Fanai

- Theih chang se

6 Marshall FK ft Ruatfel

- Fahrah nun

7 Laithangpuia Kullai

- Tawn leh ka nuam

8 C Sanga

- Lungrunpui

9 Michelle Varte

- Sakhmelṭhachuang

10 Pantei

- Tawnmang