Thia puan an nih hnua dam leh Rockstar pasarih chu

Isua Krista anga thihna hneha tho leh chu an ni lo a, mahse khawvel huapa lar rockstar pasarih chu thi tawha puan an nih zet hnuah an dam chhuak leh a, ṭhenkhat phei chu vawiin thlengin an la lar em em a ni.

Khawthlang milarte pawh khuan larna nun khu an zo lo ve ṭhin hle a, 

ṭhenkhat chu harsa tak kara chawr chhuakte an nih bawk avangin an lara sum an ngah hnu hian zu leh ruihhlo an khawih nasa ve ṭhin hle, rockstar kan tarlan tur ṭhenkhatte pawh hi an ruihhlo tih nasat avanga an thi emaw tih hialte an ni ve hlawm a, mahse ṭhenkhat chu khawvel thiamna hmangin an hnuk chat turte pawh an chhanchhuak ve hlawm thung.

Pantera vocalist Philip Anselmo hian damdawi a khawih nasa ṭhin hle. Tunah erawh kum eng emaw zat chu ruihhlo lakah hian a filhim tawh a, a nun hlimawm sawt zia thute pawh a sawi fo tawh a ni.

Kum 1996 khan Dallas-a show an neih zawh hnuah heroin a overdose a, minute 4-5 lai chu a lungphu a tawp hman a, mahse vanneihthlak takin Cemetery Gates 'singer' nunna hi an chhan chhuak hman hlauh.

Guitarist huhang ngah tak, Guns N' Roses Saul Hudson, Slash tia hriat lar hi kum 1990 chhoah khan San Francisco hotel hallway-ah nikhaw hre loa hmuh a ni. Ani pawh hi cocaine leh heroin chawhpawlh overdose vangin minute riat vel lai a marphu an hmu lo a, cardiac arrest vangin a thi niin an sawi hman. Mahse ani pawh hi a hun a lo la thleng lo hlauh a, an chhan chhuak leh hman a ni.

Bak lu sehchhumtu, rockstar bawraw ve tak Ozzy Osbourne hi December 2003 khan a chenna in bulah a chesual a, minute hnih chhung a marphu an hmu lo a, amaherawhchu a thih hun atana ruat a lo la ni lo hlauh a niang chu, vanneihthlak takin an a nunna chu chhan hman a ni. Hemi ṭum hian a nakruk pariat, a khingkhang ruh leh a nghawng ruhte a tliah a ni.

Slade drummer hi kum 1973 khan Wolverhampton-ah car-in a chesual a, ṭum hnih ngawt a lung a phu lo hman. Mahse a dam chhuak leh a, a kheimit ruh leh a nakruk panga a tliak a ni.

Ministry frontman Al Jourgensen pawh hian ṭum thum ngawt thia puan a nih thu an kawmnaah a sawi mauh mai. 

Queens of the Stone Age frontman hi an zainain infection a neih avangin cardiac arrest a nei a, inzaina dawhkanah a thih deuhthaw hman tih leh a nunna erawh an chhan hman hram thu a sawi a ni.

Mötley Crüe bassist Nikki Sixx pawh hi December 23, 1987 khan heroin overdose vangin a thi tih an puang hman. Mahse paramedic pakhat chuan a awmah adrenaline-in vawi hnih a chiu a, a dam chhuah leh phah a ni. Hemi chungchang hi a lehkhabu The Heroin Diaries-ah a ziak nghe nghe.