Priyanka Chopra A vun rawng ṭha a ti tawk

Indian actress, Hollywood thlenga hlawhtling Priyanka Chopra chuan a vun rawngah ṭha a inti tawk a, midang a awt vak lo.

Kum 34 mi actress chuan inrintawkna a nei lo ṭhin tih a sawi a, a inrintawk lohna tibo tur hian a naupan deuh lai chuan vun tiêng thei cream a hmang ṭhin. Ngo tâwk lo nia a inhriat avangin inrintawkna a tlachham fo a, tunah erawh chuan chutiang chu a ni tawh lo a, ṭha a inti tâwk tawh a, a vun rawng pawh a duh ang chiah a ni. A ngo loh avanga hrehawm tihna a nei tawh lo a, a inchhuang hle tawh zawk.

“India-ah chuan vun tiêng thei cream hi an fak mawi nasa ṭhin a, ‘chawlhkar khat chhung mai pawhin i vun chu a êng nghal ang,' an ti. Acting-ah ka lut a, skin lightening cream ang hi faknaah ka fak bawk a, chuta ka hmuh ve leh chuan, ‘Hrep chuan, eng nge ka tih tak?’ ka ti a, ka lan dana ka lungawizia leh ka inchhuanzia ka sawi ṭan ta zawk a ni,” a ti.

Glamour chanchinbuin an kawmnaah Priyanka hian heng thute hi a sawi a ni. Hei bakah hian Indian a nih avanga chhaih a tawh ṭhin thu sawi chhuak bawkin, “Indian-te hi eng ang nge an nih tih hi mi tam takin kan hre lo a ni. Keimahni dik loh vang pawh a nihna chin a awm. Kan nihna tak tak hi kan theihnghilh ṭhin,” a ti a, miin an vun rawng dan avang leh, an Sap ṭawng lam a dan avanga an ngaih thiam loh hlauh avangin Indian nih an zahpui ṭhin niin a ngai.